2 Kings 4
1 有一個寡婦，厥老公係先知群个一儕；姖去見以利沙，求佢講：「先生，若僕人—吾老公已經過身！你知佢係敬畏上主个人。這下有一個債主來，愛將𠊎兩個孻仔帶去做奴才。」
2 以利沙問：「𠊎做得為你做麼介呢？㧯𠊎講，若屋下還有麼介東西？」寡婦講：「使女只有一細罌橄欖油，以外麼介都無。」
3 以利沙㧯姖講：「你去向鄰舍借兜空个罐仔、罌仔，越多越好。
4 然後，你㧯你兩個孻仔入去屋肚，關好門，將油倒入罐仔、罌仔，裝滿就放在一片。」
5 恁樣，該寡婦就離開以利沙，㧯兩個孻仔入去屋肚，關好門，厥孻仔拿等罐仔、罌仔，姖就倒油。
6 佢等倒滿所有个罐仔、罌仔以後，寡婦問還有罐仔、罌仔麼？有一個孻仔應講：「無了！」恁樣，橄欖油就停掉了。
7 寡婦轉到神人以利沙該位，以利沙對姖講：「將橄欖油拿去賣來還債！賸到个錢罅擺你等子𡟓生活了！」
8 有一日，以利沙到書念去。該位有一個有錢个婦人家；姖強留以利沙食飯。對該擺以後，以利沙逐擺到書念去，就會到厥屋下食飯。
9 婦人家對厥老公講：「𠊎看出該常常到𠊎等這位來个，係一個聖潔个神人。
10 𠊎等在屋頂來起一隻細間房，底背放一張眠床、桌仔、凳仔㧯燈臺。佢來𫣆屋下个時，就做得在該位歇。」
11 有一日，以利沙來到書念，就上到該隻間房歇睏。
12 以利沙吩咐僕人基哈西：「你喊書念个婦人家來！」佢就喊該婦人家來到以利沙該位。
13 以利沙對基哈西講：「你問姖，𠊎做得為姖做麼介。姖為到供給𫣆个需要常常操心，𠊎愛報答姖。可能姖愛𠊎到王該位抑係元帥該位為姖講幾句好話。」婦人家講：「𠊎住在自家人个當中，麼介都無欠。」
14 以利沙問基哈西：「恁樣，𠊎做得為姖做麼介呢？」基哈西講：「姖無孻仔，老公又恁老了。」
15 以利沙講：「喊姖過來！」該婦人家就過來，企在門口。
16 以利沙對姖講：「明年這時節，你會揇等一個孻仔。」該婦人家應講：「先生，你係神人，做毋得騙𠊎噢！」
17 該婦人家正經就有身項，第二年春天𫱔一個孻仔，就像以利沙所講个。
18 細人仔緊來緊大，有一日，佢到收割个工人該位去尋厥爸。
19 細人仔忽然對厥爸講：「𠊎頭那痛！𠊎頭那痛！」厥爸對一個僕人講：「將細人仔揇轉厥姆該位去！」
20 僕人就將細人仔揇轉厥姆該位。細人仔坐在厥姆个膝頭頂，到當晝卻死掉。
21 阿姆將細人仔揇到神人以利沙个間房，放在眠床頂，關好門，就走。
22 婦人家喊厥老公來，對佢講：「你派一個僕人牽一隻驢仔到這位來；𠊎愛遽遽到神人該位去，黏時轉來。」
23 厥老公講：「做麼介你今晡日一定愛去見佢？今晡日毋係安息日，也毋係初一啊！」婦人家講：「無麼介事情！」
24 然後，姖預備驢仔，又吩咐僕人講：「遽遽來逐驢仔！𠊎無吩咐你，你就毋好慢下來。」
25 恁樣，婦人家就趕緊去到神人个所在迦密山。神人遠遠就看到該婦人家到來，對僕人基哈西講：「你看！書念个婦人家來了！
26 你遽遽走去迎接姖，問姖一切平安麼？厥老公平安麼？厥孻仔平安麼？」婦人家講：「平安！」
27 當姖上山，行到神人以利沙面前，就揇等佢个腳。基哈西行過來愛將姖㩳開，總係神人講：「由在姖啊！你無看到姖恁痛苦嗎？上主將事情囥等，無㧯𠊎講。」
28 婦人家講：「先生，𠊎識㧯你求過孻仔麼？𠊎毋係㧯你講過，毋好騙𠊎嗎？」
29 以利沙對基哈西講：「遽遽！䌈好你个腰帶，拿𠊎个杖仔去！在路項堵到人，毋好㧯佢講話。若係有人㧯你問安，毋好應佢。到該位，愛將𠊎个杖仔放在細人仔个面項。」
30 細人仔个阿姆對以利沙講：「𠊎指等永生个上主㧯你發誓，𠊎絕對毋離開你！」所以以利沙就起身跈姖去。
31 基哈西先去，將以利沙个杖仔放在細人仔个面項，總係無透氣聲，乜無挺動。所以佢轉頭去見以利沙，講：「細人仔無醒過來！」
32 以利沙行入間房，看到細人仔死掉，放在自家个眠床頂。
33 佢將門關好，只有佢兩儕在底背；佢就向上主祈禱。
34 然後佢上眠床，伏在細人仔个身上，嘴對嘴、目珠對目珠、手對手。因為佢伏在細人仔个身上，細人仔个身體就燒暖起來。
35 以利沙就下來，在間房肚行來行去，然後又上眠床，伏在細人仔身上。細人仔連打七擺哈啾，目珠就擘開來了。
36 以利沙喊基哈西講：「去喊該書念个婦人家來！」婦人家來到，以利沙對姖講：「將若孻仔揇起來。」
37 婦人家就入來，伏在以利沙腳前行禮，然後揇等孻仔出去。
38 有一擺，以利沙轉到吉甲，該地方有飢荒。佢在該位教一群先知个時，佢吩咐僕人將大鑊頭放在火頂高，煮兜湯給佢等食。
39 有人到田肚摘野菜，看到一頭野生个瓜藤，就摘盡多野瓜轉來。佢將野瓜切碎放入鑊頭，雖然佢等毋知該係麼介瓜。
40 煮好就倒出來食。總係佢等一食到該湯就大聲喊：「神人哪，鑊肚个東西會食死人噢！」大家全部毋敢食。
41 以利沙吩咐拿兜麵粉來，就委入鑊頭肚，講：「倒出來給大家食！」鑊頭肚个湯就無毒了。
42 另外有一擺，有一個人對巴力‧沙利沙來，帶二十隻餅給神人以利沙，係初熟个大麥做个。佢也帶一袋新出个麥仔。以利沙吩咐僕人將食物分給該兜先知食。
43 總係僕人問：「這兜罅一百儕食麼？」以利沙應講：「做你拿給佢等食！因為上主講，佢等定著會食飽，還會有賸。」
44 所以僕人將食物擺在佢等面前，佢等就食。就像上主所講个，大家全部食飽，還有好賸。